AA制都搞到開片兼上頭條? 咁呢對講手男女如果嚟我公司做, 真係殺人都似, 因為我公司有位同事連AA制都費事睬你, 直情係日日食飯唔俾錢, 話時話係咪每間公司都有呢啲人架呢?
見到呢單新聞, 我不期然諗起呢位同事, 唔關男女平唔平等事, 亦唔係咩桃色糾紛, 而係佢成日食飯唔俾錢, (唔係康仔, 康仔柒得嚟其實好正真) 咁你知啦, 一大班同事出去食Lunch, 或者夜晚出嚟飲杯嘢, 係幾咁平常吖, 偏偏呢個同事永遠都唔夾返錢, 首先埋單佢例牌縮到最後, 唔緊要啦, 咪其他人俾住先囉, 下下喺公眾地方籌期又好樣衰嘛, 之後夾返好閒啫, 但佢永遠冇咗件事, 大部份時間佢都會話未禁錢, 聽日俾返, 但係聽日問佢呢? 佢都係會話哎吔唔記得, 一日推一日。
其實同事之間去食飯, 下下要人哋出聲先夾返, 已經搞到好尷尬, 講緊唔係一次半次喎, 係次次喎, 係一至五everyday喎, 畢竟同事未必真係好似死黨咁熟, 唔通為咗幾十蚊飯錢搞到氣氛奇奇怪怪咩, 呢啲嘢自己識Do啦, 幫你出錢啲同事一樣有自己嘅負擔, 係咪?
我都有諗過背後係咪有啲慘痛故事, 例如屋企真係好窮呀、要養家呀、媽媽病咗呀、幫女朋友還緊大耳窿呀..., 不過呢位同事係好爛玩, 成日都會去街同friend飲嘢唱K睇戲, 咁即係點? 要其他同事幫補佢去玩嘅使費? 而且冇任何人要佢請客或俾多一分一毫, 只係想佢負責返自己嗰份咋。
大家一早知咩事, 有次成班人講好, 返到公司圍埋一齊夾返, 當係俾啲群眾壓力佢, 但條友都係唔俾, 話未禁錢要聽日先, 或者有時佢都會俾返一次, 但就好似skip咗之前嗰幾次咁。
有次扮傻等大家好落台咁提佢: E...你俾咗未? 佢就會: 呀係喎, 未俾添。 然後佢繼續做嘢或禁電話, 咁你答嚟做乜春呀? 我哋唔係要你個答案呀, 我哋係要你俾返自己嗰份呀！
有啲比較無所謂嘅同事, 唔敢發惡或正面追佢, 結果就俾佢前前後後欠緊成二千蚊飯錢, 你計下喇, 食個lunch頂盡50-70蚊, 可以欠到成二千蚊, 可想而知欠咗幾多餐, 而且佢係唔會俾返全數你, 最多俾返一餐半餐嘅錢, 然後當冇事發生過, 喂咩人黎架?
Search